काठमाडौं । रसुवामा आएको विनाशकारी बाढी तथा पहिरोबाट प्रभावित परिवारको राहत तथा पुनर्स्थापनाका लागि सिद्धार्थ पेलेट फिड प्रालिले ११ लाख ५५ हजार ५५५ रुपैयाँ आर्थिक सहयोग गरेको छ।
कम्पनीले आफ्नो सामाजिक उत्तरदायित्वअन्तर्गत उक्त रकम प्रधानमन्त्री दैवी प्रकोप उद्धार कोषमा अनलाइनमार्फत जम्मा गरेको जनाएको छ।
भोटेकोशी तथा आसपासका क्षेत्रमा आएको बाढी र पहिरोले रसुवाका विभिन्न स्थानमा घर, खेतीपाती, पशुधन तथा दैनिक जीविकोपार्जनमा क्षति पुर्याएको छ। विपद्का कारण प्रभावित परिवार कठिन परिस्थितिमा रहेका बेला राहत तथा पुनर्स्थापनाको प्रयासमा सहयोग पुगोस् भन्ने उद्देश्यले आर्थिक सहयोग गरिएको कम्पनीले जनाएको छ।
कम्पनीले विपद्को समयमा पीडित नागरिकको साथमा उभिनु निजी क्षेत्रको सामाजिक दायित्व भएको बताएको छ। प्राकृतिक विपद्बाट प्रभावित परिवारलाई तत्काल राहत र दीर्घकालीन पुनर्स्थापनाका लागि सरकार तथा सम्बन्धित निकायको प्रयासमा निजी क्षेत्रले समेत हातेमालो गर्नुपर्ने कम्पनीको भनाइ छ।
‘विपद्को समयमा प्रभावित नागरिकको साथमा उभिनु हाम्रो सामाजिक दायित्व हो,’ कम्पनीले भनेको छ। आगामी दिनमा पनि मानवीय सहायता, विपद् व्यवस्थापन तथा सामाजिक सेवाका क्षेत्रमा आफ्नो सहयोग र सहभागितालाई निरन्तरता दिने कम्पनीले प्रतिबद्धता जनाएको छ।
अत्याधुनिक प्रविधिबाट प्रतिघण्टा २० टन दाना उत्पादन
२०६६ सालमा स्थापना भएको सिद्धार्थ पेलेट फिड प्रालि नेपालको अग्रणी पशुपन्छी दाना उद्योगमध्ये एक हो। कम्पनीले स्विट्जरल्यान्डको बुहलर (Bühler) कम्पनीको अत्याधुनिक प्रविधि प्रयोग गरी प्रतिघण्टा २० टन उत्पादन क्षमतामा गुणस्तरीय पशुपन्छी दाना उत्पादन गर्दै आएको जनाएको छ।
कम्पनीका अनुसार दाना उत्पादनमा प्रयोग हुने कच्चा पदार्थको भौतिक, रासायनिक तथा पोषणसम्बन्धी गुणस्तर परीक्षण गरिन्छ। उत्पादन प्रक्रियाका प्रत्येक चरणमा कडा गुणस्तर नियन्त्रण अपनाउँदै किसानको आवश्यकता र उत्पादनको गुणस्तरलाई प्राथमिकतामा राखेर काम गर्दै आएको कम्पनीले जनाएको छ।
पोल्ट्री तथा पशुपालन क्षेत्रमा गुणस्तरीय दाना उपलब्ध गराउँदै आएको सिद्धार्थ पेलेट फिडले विपद्को समयमा आर्थिक सहयोगमार्फत आफ्नो व्यावसायिक भूमिकासँगै सामाजिक उत्तरदायित्व पनि निर्वाह गरेको छ।
रसुवाका बाढीपीडितको राहत तथा पुनर्स्थापनाका लागि निजी क्षेत्रबाट सहयोग जुटिरहेका बेला सिद्धार्थ पेलेट फिडको सहयोगले प्रभावित परिवारको राहतमा थप योगदान पुग्ने अपेक्षा गरिएको छ।
