संघले २०८३ असोज ७ गतेदेखि लागू हुने गरी चितवनलाई आधारमानी अण्डाको डिपो तथा डिलर होलसेल बिक्री समर्थन मूल्य तोकेको छ। नयाँ मूल्यअनुसार XL अण्डाको मूल्य प्रति पेटी रु. ४ हजार ३ सय र ठूलो अण्डाको मूल्य प्रति पेटी रु. ४ हजार २ सय कायम गरिएको छ।
संघका अनुसार ५६.५ देखि ६१.५ ग्रामसम्मको XL अण्डाको मूल्य रु. ४,३०० प्रति पेटी तथा ५३.५ देखि ५६.५ ग्रामसम्मको ठूलो अण्डाको मूल्य रु. ४,२०० प्रति पेटी निर्धारण गरिएको हो।
उपभोक्ता मूल्य पनि तोकियो
संघले उपभोक्ता बजारमा बिक्री हुने अण्डाको मूल्यसमेत उल्लेख गरेको छ। सूचनाअनुसार ठूलो अण्डा प्रतिगोटा रु. २५ तथा मिडियम अण्डा दुई गोटाको रु. ४५ कायम गरिएको छ।
अण्डा उत्पादनमा लाग्ने दाना, चल्ला, श्रम, औषधि, विद्युत् तथा अन्य व्यवस्थापन खर्चलाई ध्यानमा राख्दै किसानले उत्पादन गरेको अण्डाको उचित मूल्य सुनिश्चित गर्ने उद्देश्यले समर्थन मूल्य निर्धारण गरिएको संघको सूचनाबाट देखिन्छ।
किसानदेखि बजारसम्म मूल्यमा एकरूपता ल्याउने प्रयास
नेपालको लेयर्स व्यवसायमा अण्डाको मूल्य उत्पादन क्षेत्र, माग, आपूर्ति तथा बजारको अवस्थाअनुसार परिवर्तन हुँदै आएको छ। उत्पादन लागत र बजार मूल्यबीच सन्तुलन कायम गर्न नसक्दा किसानहरू प्रभावित हुने अवस्था आउन सक्ने भएकाले उत्पादकहरूको साझा रायका आधारमा समर्थन मूल्य निर्धारण गरिएको संघले जनाएको छ।
बैठकमा देशका विभिन्न क्षेत्रका अण्डा उत्पादकहरूको अवस्था तथा बजारसम्बन्धी विषयमा छलफल भएको थियो। प्राप्त राय, परामर्श तथा सिफारिसका आधारमा चितवनलाई आधार मानेर नयाँ समर्थन मूल्य निर्धारण गरिएको हो।
संघले नयाँ मूल्यअनुसार अण्डाको कारोबार गरिदिन डिपो, डिलर तथा सम्बन्धित व्यवसायीहरूलाई अनुरोध गरेको छ। नयाँ मूल्य असोज ७ गतेदेखि लागू हुनेछ।
नेपाल लेयर्स कुखुरापालक संघका सचिव मदन पोखरेलले जारी गरेको सूचनामा निर्धारित मूल्यमा कारोबार गर्न सम्बन्धित सबै पक्षलाई आग्रह गरिएको छ।
नयाँ समर्थन मूल्य निर्धारण
